Sparmentu i invertimentu – Nan ta mes espesie?

August 10, 2017

“Kuantu mionario bo konosé ku a bira riku dor di invertí den kuenta di spar? Te aki mi a yega”

- Robert G. Allen

 

Sabí di bo di djòin e banda aki! E ta primintí di bira edukashonal, lukrativo si bo aplik’é huisiosamente anto no laga nos lubidá – prèt! Laga nos bula den mesora! Nos lo kuminsá ku e parti mas fundamental, e base di tur esaki, e piedra angular di e meta final riba kua nos ta dirigí nos mes.

 

Un idea robes

Pero promé mi divulgá e loke a hasi bo tan intrigá, bisami algu: Si un hende puntrabo: “ kiko ta e diferensia entre spar i invertí?” Ki deklarashonnan lo bo por bini kuné pa kontesta e pregunta? Lo bo por ekspresá e berdadero diferensia korektamente òf lo bo kontestá ku algu manera: “hmm,” –pousa di 5 sekònde “Mi ta pensando” – i sigui ku “esei ta un pregunta hopi interesante, pero tin un diferensia?”

 

Si bo ta pensa e delaster aki, e ora ei bo no ta bo so. 9 di kada 10 persona ta kere ku spar i invertí ta mesun kos! Mi ta hasi wega; por ta mi ta eksagerá. Mi a djis inventá e statistik ei.....Pero si nos ta kompletamente onesto ku nos mes nos lo atmití ku mi statistik inventá no ta masha leu for di bèrdat!

 

Si bo a kontesta ku e delaster, bo ta kore rònt ku míles komo bo kompañeronan ku ta pensa ku spar i invertí ta interkambiabel no solamente den un frase pero tambe den supstansia. Esaki ta un gran malkomprondementu i mi lo trata di splika di kon e punto di salida aki ta inkorekto!

Bo ta spar of bo ta inverti?

Kiko ta spar lo bo por puntra – e ta e akto di posponé konsumo dor di pone un banda un parti di bo entrada koriente den un vehíkulo relativamente sigur, normalmente pa un meta, un intenshon òf evento spesífiko den futuro, ku e intenshon di konservá e balor di bo kapital – e suma original ku ta wòrdu di spar. Sparmentu ta wòrdu hasí normalmente via métodonan di poko riesgo, manera un kuenta di spar.

 

E implikashon ta ku e ganashi ta relativamente abou – e interes lokal ta kologá rònt di 1% - i asina e balor final di sènnan di spar lo no ta signifikantemente diferente for di e kapital. E riesgo potensial ta ku e poder di kompra di bo sèn di spar por fásilmente wòrdu distruí dor di inflashon. Den otro palabra, por ta lo bo no por kumpra e mesun set di produkto ku lo bo por a kumpra pasobra e preis di e produktonan a subi mas lihé ku bo sènnan di spar a krese. E konklushon, hamas i nunka... nunka.... nunka...... nunka...nunka por bira riku dor di solamente spar

 

Esaki ta unda invertí ta diferente! Kaminda sparmentu ta trata di konserva e kapital, invertimentu ta bai un stap mas aleu ku e ophetivo adishonal di krea rikesa!;;;;;;

 

No wòrdu engañá, meskos ku sparmentu, ora bo invertí, bo ta en bèrdat posponé konsumo, pero ei ta unda e similitut ta kaba. Ku invertimentu, e ekspektativa i meta ta pa alkansá un resultado di ganashi material pa asina krea rikesa unda anteriormente nunka el’ a eksistí. Pa e motibu aki, hendenan tin e tendensia di invertí via métodonan ku mas riesgo i mas sofistiká - pa medio di e bolsa di balor, dor di start òf manehá un negoshi òf dor di bai den real estate. E implikashon prinsipal ta ku invertimentu tin hopi mas riesgo ku sparmentu, pero e rekompensa ta hopi mas grandi tambe!

 

Sparmentu no ta rekerí masha konosementu di finansa, nos ta djis pone a sèn den un kuenta di banko sabiendo ku interes ta wòrdu ganá. Pa e motibu aki, sparmentu ta loke e mayoria di nos ta hasi! Pero no komprondémi robes, sparmentu ta nesesario i e ta ideal pa situashonnan di emergensia.

Den práktika, un plan di spar mester ta parti di bo planifikashon finansiero general anto asina tambe invertimentu.

Loke bo tin ku hasi ta inverti

Ku esei bisá, mi ta rekomendá bo altamente pa invertí tambe! Pues si bo no tabata hasi esaki kaba, kuminsá pensa riba un strategia di invershon AWOR! Siña mas tantu ku ta posibel tokante invertimentu. I keda pendiente di e artíkulonan aki tanten ku nos ta trata di ekspandé bo konsiensia i konosementu di invertimentu pa bo pasonan ta guiá i informá na kaminda pa oportunidatnan pa krea rikesa! 

Pidi pa un sita. E ta gratis!

 

“ Profeshonalnan di invershon eksitoso ta disipliná i konsistente i nan ta pensa hopi riba kiko nan ta hasi i kon nan ta hasi esei” Benjamin Graham

 

Bek na Komienso

Please reload

Our Recent Posts

Please reload

Archive

Please reload

Tags

Please reload

Willemstad, Curaçao

  • Vertex Investments Facebook
  • Vertex Investments Twitter
  • Vertex Investments LinkedIn

©2019 VERTEX INVESTMENTS. ALL RIGHTS RESERVED.